15.8.10

မလက်ကာမြို.မှ တံဆိပ်ခေါင်းပြတိုက် (၂) (MELAKA STAMP MUSEUM)

ကျွန်တော်တို့ မြန်မာနိုင်ငံမှာ တံဆိပ်ခေါင်းများကိုချည်း သီးသန့်ပြသထားတဲ့ တံဆိပ်ခေါင်းပြတိုက် ရယ်လို့ ကျွန်တော်မတွေ့ဖူးခဲ့ပါဘူး။ အခန်းတစ်ခု အနေနဲ့ အများနဲ့ရောပြထားတာတွေတော့ ရှိပါသည်။ အမျိုးသားပြတိုက်မှာ ကျွန်တော်တွေ့ခဲ့ဖူးသည်။ ရှေးဟောင်းပစ္စည်းစုဆောင်းတာ ၀ါသနာပါတဲ့ ရဟန်းတွေ ၊ လူပုဂ္ဂိုလ်တွေရဲ့ ကိုယ်ပိုင် ပြခန်းလေးတွေမှာ ကြည့်ခဲ့ဖူးသည်။ သူငယ်ချင်းတွေရဲ့ albums တွေမှာ မြင်ခဲ့ဖူးသည်။ အရောင်းပြခန်းတွေ ကတော့ အများကြီးရှိပါသည်။ ရန်ကုန်စာတိုက်ကြီး၊ ဗိုလ်ချုပ်အောင်ဆန်းဈေး၊ ပန်းဆိုးတန်းနားတ၀ိုက်၊ ဟိုတယ်တချို့၊..........။  ၀ါသနာပါ ပြည်သူတွေ အနေနဲ့ ငွေကြေးသုံးစွဲဖို့ အခက်အခဲ ရှိကြတော့ ၀ယ်ပြီး စုဆောင်းဖို့အထိ စိတ်နောက် ကိုယ်ပါ မလိုက်နိုင်ကြပါဘူး။ ဒီတော့ တံဆိပ်ခေါင်းအရောင်းဈေးကွက်က အလည်လာတဲ့ နိုင်ငံခြားသားတွေကိုဘဲ ရည်ရွယ်သလို ဖြစ်နေပါသည်။

မှတ်တမ်းတွေအရ ကျွန်တော်တို့ မြန်မာနိုင်ငံမှာ တံဆိပ်ခေါင်းစတင်သုံးစွဲတာ ၁၈၈၀-၈၁ ခုနှစ် နောက်ပိုင်းမှ ဖြစ်သည်။ ဗြိတိသျှပိုင် အိန္ဒိယနိုင်ငံ၏ လက်အောက်ခံနယ်အဖြစ်ရှိစဉ်က အိန္ဒိယနိုင်ငံသုံး တံဆိပ်ခေါင်းများကို ဘားမား (Burma) စာတမ်း ထပ်ဆင့် ရိုက်နှိပ်ပြီး အသုံးပြုခဲ့ရသည်။ တံဆိပ်ခေါင်း သုံးစွဲမှုသက်တမ်း နှစ်ပေါင်း ၁၀၀ ကျော်လာပြီဖြစ်သဖြင့် ထိုက်သင့်သော သမိုင်းကြောင်း ရှိနေပါပြီ။ တံဆိပ်ခေါင်းပြတိုက်တစ်ခု အနေနဲ့ ရှိသင့်ပါပြီ။ ကျွန်တော်တို့နိုင်ငံ စံနှုန်းအရ ပြတိုက်များသည် လူစည်ကားသော နေရာမဟုတ်သဖြင့် စီးပွားရေးအရ အောင်မြင်မည် မဟုတ်သော်လည်း နိုင်ငံတစ်ခုအနေဖြင့် ပြည်သူ့ ဘဏ္ဍာငွေများကို အမျိုးသား တံဆိပ်ခေါင်းပြတိုက်တစ်ခု အတွက် အရှုံးခံသင့်ပါသည်။

မလက်ကာမြို. တံဆိပ်ခေါင်းပြတိုက်သည် စီးပွားရေးအရ အောင်မြင်မည် မထင်သော်လည်း ပြတိုက်အနေဖြင့် ကျကျနန ပြင်ဆင်ထားသည်။ လေအေးစက် တပ်ဆင်ထားသည်။ သန့်စင်ခန်း    ကောင်းမွန်သည်။ ပြခန်းများ အလင်းပေးထားပုံ သပ်ရပ်သည်။ အခြေခံ လိုအပ်ချက်များမှာ စိတ်ကျေနပ်စရာကောင်းပါသည်။

ပြတိုက်အပေါ်ထပ်ကိုလည်း ပြခန်း ၄ ခန်း ဖွဲ့ထားပါတယ်။ ပထမအခန်းတွင် မလေးရှားနိုင်ငံ စာပို့တိုက်လုပ်ငန်း၏ ရှေးဟောင်းစာတိုက်ပုံးများ၊ ၀န်ထမ်း ယူနီဖောင်းများကိုပြသထားတယ်။ ဒုတိယအခန်းက multimedia room ဆန်သည်။ Projector တပ်ဆင်ထားသည်။ ဘာတွေပြမလဲတော့မသိပါ။




တံဆိပ်ခေါင်းဝါသနာရှင်တစ်ဦး အနေဖြင့် အကြိုက်တွေ့မည့် နေရာမှာ တတိယနှင့် နောက်ဆုံးပြခန်းများဖြစ်သည်။ ဤအခန်းတွင် မလေးရှားနိုင်ငံ၏ ၁၉၅၅ မှ ၂၀၀၉ ခုနှစ် အထိ ထုတ်ဝေခဲ့သမျှ တံဆိပ်ခေါင်းများကို နံရံကပ် ဗီရို အံဆွဲများဖြင့် ပြသထားသည်။ အချိူ့မှာ အသုံးပြုပြီးသားများ ဖြစ်သည်။ ကြည့်ရှုချိန်များစွာ မရသဖြင့် အံဆွဲ ၃ ၊ ၄ ကိုသာ ဆွဲဖွင့် ကြည့်ခဲ့သည်။ မလက်ကာမြို့နှင့်သာ သီးသန့် သက်ဆိုင်သည့် စာလေး တစ်စောင်ကိုလည်း ပြသ ထားသည်။ ၃-၉-၃၇ နေ့စွဲဖြင့် စာတစ်စောင်ဖြစ်သည်။







၁၉၅၅ မှ ၂၀၀၉ ခုနှစ် အထိ ထုတ်ဝေခဲ့သမျှ တံဆိပ်ခေါင်းများ


၃-၉-၃၇ နေ့စွဲဖြင့် စာတစ်စောင်

နောက်ဆုံးအခန်းမှာ အဖိုးတန်းရှေးဟောင်း တံဆိပ်ခေါင်းများကို ပြသထားသည်။ သည်လောက် ရှေးဟောင်းတံဆိပ်ခေါင်းများကို ကျွန်တော်အရင်က မမြင်ဖူးခဲ့ပါ။ Victoria ဘုရင်မ ခေတ်အတွင်း ၁၈၄၀ မှ ၁၉၀၁ ခုနှစ် အထိ ထုတ်ဝေခဲ့သည့် တံဆိပ်ခေါင်းများ၊ Edward VII ဘုရင်ခေတ် ၁၉၀၁ မှ ၁၉၁၀ ခုနှစ် အထိ တံဆိပ်ခေါင်းများ၊ ဗြိတိသျှပိုင် လက်အောက်ခံနယ်အဖြစ်ရှိစဉ်က ထုတ်ဝေခဲ့သည့် တံဆိပ်ခေါင်းများ ၊ .....စုံလင်လှပါသည်။ ဒီရှေးဟောင်းတံဆိပ်ခေါင်းများကို မြင်ခွင့်ရတာ ကျေနပ်ဖို့ ကောင်းပါသည်။ ငွေကြေးဖြင့် တန်ဖိုးဖြတ်မရသော ခံစားမှု ဖြစ်သည်။









ပြတိုက်မှ အပြန်လမ်းတွင် မိုးက ဖွဲဖွဲ ရွာနေသေးသည်။ ကျွန်တော်တို့ နိုင်ငံမှာလည်း တံဆိပ်ခေါင်းများကို သီးသန့်ပြသထားတဲ့ တံဆိပ်ခေါင်းပြတိုက် ရှိရင် ကောင်းမှာပဲဟု တွေးတောနေမိပါသည်။


စောသက်လင်း

ကျမ်းကိုး - ၁၉၈၀ စာပေဗိမာန်စာမူဆု သုတပဒေသာ (ဝိဇ္ဇာ) ပထမဆုရ
              " ပြည်သူကို ပညာပေးသော တံဆိပ်ခေါင်းများ " ၊ ဘုတလင် သစ်နီ ၊
            - တံဆိပ်ခေါင်းဓါတ်ပုံများ မျှဝေပေးသော သူငယ်ချင်း အောင်စိုးသူ အား ကျေးဇူးတင်ပါသည်။

----------------------------------------------------------------------------------------------------------

No comments:

Post a Comment