11.8.10

မလက်ကာမြို.မှ တံဆိပ်ခေါင်းပြတိုက် (MELAKA STAMP MUSEUM)

မလက်ကာမြို.ကို သွားလည်မယ်လုပ်တော့ ကျွန်တော် မဖြစ်မနေရောက်အောင် သွားမယ်လို့ တေးမှတ်ထားတဲ့ နေရာတွေထဲမှာ တံဆိပ်ခေါင်းပြတိုက် မပါ ပါဘူး။ တံဆိပ်ခေါင်းပြတိုက် အကြောင်းကို မလက်ကာ လက်ကမ်း လမ်းညွှန်တွေ ၊ အင်တာနက် လမ်းညွှန်တွေမှာလည်း ကျွန်တော် မတွေ့မိလိုက်ဘူး။ သမိုင်းတွေနဲ့  မြို.တစ်မြို.လို့ နာမည်ရှိတဲ့ မလက်ကာမှာ ဒီလို ပြတိုက်ရှိနိုင်တယ်လို့လည်း မတွေးမိခဲ့ပါဘူး။ 

ရုတ်တရက် ရွာချလိုက်တဲ့မိုးကို လွတ်အောင်ရှောင်ဖို့ နေရာရှာရင်းနဲ့ မလက်ကာမြို.ရဲ့ တံဆိပ်ခေါင်း ပြတိုက် ရှေ့ကို ကျွန်တော် အမှတ်မထင်ရောက်သွားခဲ့ပါတယ်။  
   



MUZIUM SETEM MELAKA ( MELAKA STAMP MUSEUM )

ပြတိုက်မျက်နှာစာကတော့ ဓါတ်ပုံမှာ မြင်ရတဲ့အတိုင်း အဖြူရောင် နှစ်ထပ်တိုက်ပါ။ ရှေ့တံတိုင်းမှာ ကပ်ထားတဲ့ အဆောက်အဦ မှတ်တမ်းအရ ရှေးက DUTCH အစိုးရ အရာရှိတွေ အတွက်  ဆောက်လုပ်ခဲ့ပါတယ်။ ဆောက်လုပ်ခဲ့တဲ့ ခုနှစ်ကို မတွေ့ရပါဘူး။ 19 MARCH 1954 မှာ MELAKA STATE MUSEUM အဖြစ် စတင် ပြောင်းလဲ ဖွင့်လှစ်ခဲ့ပါတယ်။ 1982 မှာ STATE MUSEUM ကို     အခြားနေရာသို့ပြောင်းရွေ့စေခဲ့ပြီး MELAKA STAMP MUSEUM အဖြစ် ပြောင်းလဲခဲ့ပါတယ်။ မလေးရှားနိုင်ငံ ပြတိုက်နှင့် ရှေးဟောင်းအဆောက်အဦများ ဌာနက ANCIENT MONUMENT တစ်ခုအဖြစ် ဥပဒေပြဌာန်း ကာကွယ်ထားတဲ့ အဆောက်အဦ ဖြစ်ပါတယ်။


            ပြတိုက်အဆောက်အဦ အ၀င်

ကျွန်တော် ပြတိုက်ထဲဝင်သွားတော့ မလေးရိုးရာဝတ်စုံ ၀တ်ဆင်ထားတဲ့ မလေးအမျိုးသားက ခုမှ ရုံးစဖွင့်တဲ့ အလုပ်ရှုပ်ပုံမျိုးနဲ့ မအားလပ်နေလေရဲ့။ ဧည့်ကြိုကောင်တာကို သေသေချာချာ ပြင်ဆင် ထားပါတယ်။ ဒီနေ့အတွက် ပထမဆုံး ဧည့်သည်ပါ။ မလေးရှား RM 1.00 ပေးရပါတယ်။ မြန်မာငွေ ၄၀၀ ကျပ် လောက်ပေါ့။


ပြတိုက်အောက်ထပ် ဧည့်ကြိုကောင်တာ 

ပြတိုက်အောက်ထပ်ကို ပြခန်း ၄ ခန်း ဖွဲ့ပြီး ခင်းကျင်းထားပါတယ်။ ဘာလို့လဲမသိဘူး...တံဆိပ်ခေါင်းရောင်းတဲ့ အခန်းကို ပိတ်ထားတယ်။ ကျွန်တော်ကလည်း တံဆိပ်ခေါင်းကို ၀ယ်ပြီး စုဆောင်းဖို့အထိ အစီအစဉ်မရှိသေးတော့ အတော်ပါပဲ။ ဒုတိယပြခန်းမှာ နိုင်ငံတကာ သံရုံးတွေက ပြတိုက်ကို လှူဒါန်းထားတဲ့ တံဆိပ်ခေါင်းတွေကိုပြထားတယ်။ တောင်ကိုရီးယား၊ လော၊ နယ်သာလန်၊ ဘရာဇီး၊.......။ မလေးရှား နဲ့ နိုင်ငံတကာက ထင်ရှားတဲ့ VIP တွေ ပြတိုက်ကို လာလေ့လာတဲ့ ဓါတ်ပုံတွေကိုလည်း ချိတ်ဆွဲထားတယ်။


နယ်သာလန်နိုင်ငံသံရုံးမှ ပြတိုက်ကို လှူဒါန်းထားသော တံဆိပ်ခေါင်းများ  

တတိယပြခန်းမှာ မလေးရှားနိုင်ငံရဲ့ တံဆိပ်ခေါင်းများ ဒီဇိုင်းရွေးချယ် ပြုလုပ်ပုံမှ ပုံနှိပ်ထုတ်ဝေတဲ့အထိ လုပ်ငန်းအဆင့်ဆင့်ကို ဓါတ်ပုံပိုစတာတွေနဲ့ ရှင်းလင်ပြသထားပါတယ်။ မလေးရှားနိုင်ငံရဲ့ လက်ရှိ အသုံးပြုနေဆဲ တံဆိပ်ခေါင်းများကိုလည်း ဒီအခန်းမှာ ကြည့်ရှု့နိုင်ပါတယ်။ ပြတိုက်အောက်ထပ်ရဲ့ နောက်ဆုံးပြခန်းမှာ မလေးရှားနိုင်ငံရဲ့ စာဖြန့်ဖြူးတဲ့ သမိုင်း ယနေ့အထိ တိုးတက်လာပုံကို ရုပ်တုတွေ၊ ပန်းချီကားတွေ၊ ဓါတ်ပုံတွေနဲ့ ရှင်းလင်းပြသထားပါတယ်။


  မလေးရှားနိုင်ငံရဲ့ လက်ရှိ အသုံးပြုနေဆဲ တံဆိပ်ခေါင်းများ


ပြတိုက်အောက်ထပ်ရဲ့ အနောက်ဘက် မြင်ကွင်း

----------------------------------------------------

No comments:

Post a Comment