22.8.10

ကျွန်တော်ပြန်ဖတ်ချင်နေသော စာအုပ်များ

ကျွန်တော် ခရီးထွက်ဖို့ ပြင်ဆင်နေပါသည်။ ခရီးက ၁၀ ရက်ကျော် ကြာပါလိမ့်မည်။ စိတ်ကူးရှိသမျှ အကောင်းဆုံး အဆင်ပြေအောင် စီစဉ်ထားပါသည်။ တည်းခိုစရာ၊ စားသောက်ဖို့ရာ ပူပန်ရန်မလို။ visaမလို၊ passportမလို။ ခရီးစဉ်ရက်များ ကာလမှာလည်း မိသားစုကိစ္စ၊ ကိုယ်ရေးကိုယ်တာကိစ္စ၊ အလုပ်ကိစ္စ  ......ကိစ္စ....များကို တွေးတော ပူပန်နေဖို့မလိုအောင် စီစဉ်ထားပါသည်။

ကျွန်တော် နောက်ထပ် ကြိုတင်စီစဉ်ထားသည်မှာ တည်းခိုမည့်နေရာတွင် internet မရှိစေရန် ဖြစ်သည်။ ရှိနေလျှင် သုံးဖြစ်မည်စိုး၍ မရှိအောင် စီစဉ်ထားခြင်းဖြစ်သည်။ internet တွင် မည်မည်ရရ မရှိပဲ ဖြုန်းတီးပစ်ခဲ့သော အချိန်များစွာကို နောင်တရမှပဲ နှမြောနေမိတော့သည်။

ကျွန်တော်သွားမည့်နေရာတွင် လည်ပတ်စရာ ရှေးဟောင်းအဆောက်အဦများ မရှိ ၊ ပြတိုက်များ မရှိ ၊ shoping mall များ မရှိ ၊ လမ်းဘေး ကော်ဖီဆိုင်များ မရှိ ၊ ထိုင်ပြီး တွေးငေးနေဖို့ကောင်းသော တူးမြောင်းဘေးမှ ခုံတန်းလျားများ မရှိ ၊.....ဘာမှ မရှိ။

ခင်ဗျားကဖြင့် မေးတော့မှာပဲ။ ဒါဆိုရင် ............။

ကျွန်တော်ထွက်မည့်ခရီးက စာဖတ်ခရီး ဖြစ်ပါသည်။ စာဖတ်ဖို့ သက်သက် ထွက်မည့်ခရီးဖြစ်သည်။ ကျွန်တော်ဘ၀မှာ စာဖတ်ဖို့အချိန် ရှားပါးနေတာ ကြာပြီ။ ကျွန်တော်ပြန်ဖတ်ချင်သော စာအုပ်များအတွက် အချိန် အလှည့်မပေးနိုင်တာ ကြာပါပြီ။ ထို့ကြောင့် ကျွန်တော် ခရီးထွက်ဖို့ ပြင်ဆင်နေခြင်းဖြစ်သည်။ အရာအားလုံး .......နှင့် လွတ်ကင်း ဝေးရာ တစ်နေရာသို့ ခရီးထွက်ပြီး ကျွန်တော်ပြန်ဖတ်ချင်သော စာအုပ်များကို ဖတ်ပစ်လိုက်မည်။

ကျွန်တော့် ကျောပိုးအိတ်ထဲသို့ ကျွန်တော့်အကြိုက် ကော်ဖီကို အရင်ထည့်ရမည်။ ကော်ဖီက နေ့စဉ်ဘ၀ ဖြစ်နေတာကြာပြီ။ ပြီးတော့  ကျောပိုးအိတ်ထဲသို့ ကျွန်တော်ပြန်ဖတ်ချင်နေသော စာအုပ်များထည့်ရမည်။ ဘာကန့်သတ်ချက်မှ မပါပဲ ရင်ထဲက ဆန္ဒသက်သက်ဖြင့် စာအုပ်များကို ရွေးရမည်။ ပြန်ဖတ်ချင်နေသော စာအုပ်တိုင်းကိုလည်း ထည့်၍ရမည်မဟုတ်ပါ။ ကျွန်တော့် ကျောပိုးအိတ်က စာအုပ် ၁၀ အုပ်သာ ၀င်ဆန့်နိုင်ပါသည်။

စာဖတ်ခရီးအတွက် စာအုပ် ၁၀ အုပ်ကို ရွေးချယ်ခြင်းဖြင့် အိပ်ပျက်ညပေါင်း အတော် ကုန်ဆုံး သွားခဲ့သည်။ နောက်ဆုံး ဆုံးဖြတ်ချက် ချအပြီးမှာတော့ ကိုယ့်ကိုကိုယ် ကျေနပ်သွားခဲ့သည်ဟု ကျွန်တော် ထင်မိပါသည်။ ခဏနေတော့ မသေချာသလို ခံစားရပြန်သည်။ ဘာပဲဖြစ်ဖြစ် နောက်ဆုံးတော့ စာအုပ် ၁၀ အုပ်ကို ကျောပိုးအိတ်ထဲ ထည့်လိုက်ပါတော့သည်။ အိတ်ကို ပိတ်လိုက်ပြီး ခရီးထွက်ဖို့ အချိန်ကို ကျွန်တော် စောင့်နေလိုက်တော့သည်။

အချိန်တစ်ခုကို ရောက်ရင်တော့ဖြင့် ကျွန်တော့်ရဲ့ စာဖတ်ခရီး စဖြစ်မည်ဟု ထင်မိပါသည်။


* * * * * * * * *

၁။ အရင်ဧကရာဇ် .. အခုလူ ၊ ဒေါက်တာ သန်းထွန်း ၊ မုံရွေး စာအုပ်တိုက်

တရုတ်နိုင်ငံကို နောက်ဆုံး အုပ်စိုးခဲ့သော ဧကရာဇ် Pu Yi ၏ ကိုယ်တိုင်ရေး  အတ္ထုပ္ပတ္တိဖြစ်သောFrom Emperor to Citizen ကို ဆရာကြီးက ဘာသာပြန်ထားခြင်းဖြစ်သည်။ PuYi ၏ ဘ၀မှာစိတ်ဝင်စားဖို့ ကောင်းသည်။ ၁၉၀၆တွင် မွေးဖွားခဲ့ပြီး သူ၏ အသက် ၂ နှစ်၁၀ လသားအရွယ် ၁၉၀၈တွင် တရုတ်နိုင်ငံကို အုပ်စိုးနေသော မင်းဆက်၏  ဧကရာဇ်ဖြစ်လာခဲ့သည်။ ဖြုတ်ချခံရလိုက်၊ ဧကရာဇ် ပြန်ဖြစ်လိုက်ဖြင့် အရွယ်ရောက်လာခဲ့ပြီး ၁၉၄၅ သြဂုတ် ၁၆ တွင် ဆိုဗီယက်တပ်နီများ၏ ဖမ်းဆီးခြင်းခံခဲ့ရသည်။ ဆိုက်ဘေးရီးယားတွင် ၃ နှစ်ကျော် နေခဲ့ရပြီး တရုတ်ပြည်သို့ ပြန်လည်လွှဲပြောင်းခြင်းခံခဲ့ရသည်။ တရုတ် ကွန်မြူနစ်ပါတီ၏ Fushun War Criminals ထောင်တွင် ဦးနှောက်ဆေးကြောခြင်းကို ၁၀နှစ်ကျော် ခံခဲ့ရပြီး သာမန်နိုင်ငံသား ဖြစ်လာခဲ့သည်။ ၁၉၆၇ အောက်တိုဘာ ၁၇ ၊ အသက် ၆၁ နှစ်အရွယ်တွင် ပီကင်းမြို့၌ ကွယ်လွန်သွားခဲ့သည်။

ကျွန်တော့်အတွက် စာအုပ်အစမှာ ဖတ်ရ အလွန်ခက်သည်။  စာအုပ်ထဲမှ   တရုတ် နာမည်များမှာ လည်း မှတ်ရ အတော်ခက်သည်။ တဖြည်းဖြည်းဖြင့် ဖတ်ရသည်။ တရုတ်ကွန်မြူနစ်ပါတီ၏ ဦးနှောက် ဆေးကြောခြင်း အခန်းများမှာ ( learning how to become a human being ) ကြောက်စရာ ကောင်းလှသည်။

သူ၏ အကြောင်းကို Columbia Pictures မှ ရုပ်ရှင်အဖြစ် ၁၉၈၇ တွင်   The Last Emperor ဇာတ်ကားကို  ရိုက်ကူးခဲ့သည်။ ရုပ်ရှင်မှာ အော်စကာဆုများ ရရှိပြီး အောင်မြင်ခဲ့သည်။  မကြာသေးခင်က ထိုရုပ်ရှင်ဇာတ်ကားကို on line မှ ဒုတိယ အကြိမ် ကျွန်တော် ကြည့်ရှုခဲ့သည်။ အမှောင်ခန်းများလွန်းသည် ထင်သော်လည်း ကျွန်တော် နှစ်သက်သော ရုပ်ရှင်ဇာတ်ကားတစ်ကား ဖြစ်ပါသည်။ 

Columbia Pictures မှ ၁၉၈၇ တွင် ရိုက်ကူးခဲ့သောThe Last Emperor ရုပ်ရှင်ဇာတ်ကား

စာအုပ် မျက်နှာဖုံး
Pu Yi , 1922







* * * * * * * * *

၂။ မရဏ အိပ်မက်တစ်ခု ၏ မှတ်တမ်း ၊ မြသန်းတင့် ၊ ရာပြည့်စာအုပ်တိုက်

          ၁၉၈၂ ခုနှစ်အတွက် စာပေနိုဗယ်ဆု ချီးမြှင့်ခြင်းခံခဲ့ရသည့် Colombia နိုင်ငံသား စာရေးဆရာ  Gabriel García Márquez ၏  Chronicle of a Death Foretold ဝတ္ထုကို ဆရာမြသန်းတင့်မှ မရဏ အိပ်မက်တစ်ခု ၏ မှတ်တမ်း အမည်ဖြင့် ဘာသာပြန်ထားခြင်းဖြစ်သည်။ဆရာမြသန်းတင့်၏ စာအုပ်အမှာတွင် မြန်မာစာဖတ်သူများကို Gabriel García Márquez နှင့် မိတ်ဆက်ပေးထားသည်။ Gabriel García Márquez ၏ ဝတ္ထုများထဲမှ မြန်မာဘာသာသို့ ပြန်ဆိုသည့် ပထမဆုံးဝတ္ထု ဖြစ်မည်ထင်သည်။ သူ၏ ဝတ္ထုများထဲမှ နောက်ထပ် မြန်မာဘာသာသို့ ပြန်ဆိုသည့် စာအုပ်များ ရှိ ၊ မရှိ ကျွန်တော် မသိတော့ပါ။ လက်လှမ်း မမှီတော့ပါ။ ရှိခဲ့လျှင် ကျွန်တော် ဖတ်ချင်ပါသည်။ Gabriel García Márquez ၏ ဝတ္ထုများမှာ ဘာသာပြန်ဖို့ လွယ်ကူလိမ့်မည်မဟုတ်ဟု ထင်ပါသည်။

          စာရေးဆရာကြီး Gabriel García Márquez ကို ၁၉၂၇ မတ်လ ၆ ရက်နေ့တွင် Colombia နိုင်ငံ Aracataca မြို့ ၌ မွေးဖွားခဲ့သည်။ တက္ကသိုလ်၌ ဥပဒေဘာသာရပ်ကို သင်ကြားနေရင်းမှ ဂျာနယ်လစ် ဖြစ်လာခဲ့သည်။ စာပေဝေဖန်သူများ၊ ပညာရှင်များက သူ၏ ဂျာနယ်လစ် လုပ်ဆောင်မှုများထက် သူ၏ ဝတ္ထုတိုများ၊ ဝတ္ထုရှည်များက ပို၍ ထင်ရှားသည်ဟု သတ်မှတ်ကြသည်။ သူ၏ စာပေဖန်တီးမှု အနုပညာ၊ အတတ်ပညာ လက်ရာစတိုင် ကို magical realism အဖြစ် သတ်မှတ်ကြသည်။ သူ၏ စာပေသြဇာမှာ လက်တင်အမေရိက နိုင်ငံများသာမက ကမ္ဘာသို့တိုင် ကြီးမားသည်။

         Chronicle of a Death Foretold ဝတ္ထုကို ၁၉၈၁ တွင် စပိန်ဘာသာဖြင့် စတင် ထုတ်ဝေခဲ့ပြီး ၁၉၈၃ တွင် အင်္ဂလိပ်ဘာသာသို့ ပြန်ဆိုခဲ့သည်။ ၄င်းတို့ကို ကျွန်တော် ဘယ်လိုလုပ် ဖတ်နိုင်ပါမည်နည်း။ ဆရာမြသန်းတင့် ဘာသာပြန်၍သာ ဤလိုဝတ္ထုမျိုး ဖတ်ခွင့်ရခဲ့ပါသည်။ ဝတ္ထုက စာမျက်နှာ နည်းနည်းလေးပဲ ဖြစ်သလို ဇာတ်လမ်းကလည်း ရိုးရိုးလေးသာဖြစ်သည်။ ပုံမှန်နည်းလမ်းဖြင့်သာ ရေးသားခဲ့ပါက ထုတ်ဝေနိုင်ဖို့ပင် ခပ်ခက်ခက်။ ဝတ္ထုတစ်ပုဒ် ဖန်တီးသည့် အတတ်ပညာ၊ အနုပညာကြောင့် ရိုးရိုး ဇာတ်လမ်းပင် ကမ္ဘာ့စာပေလက်ရာ ဖြစ်သွားခဲ့သည်။ ဤလိုဝတ္ထုသည် ဖတ်ပြီး တစိမ့်စိမ့်တွေးလေလေ အရသာတက်လာလေလေ ၊  ဖန်တီးသည့် အတတ်ပညာကို ချီးကြူးလေလေ ဖြစ်သွားပါသည်။

Gabriel García Márquez , ၂၀၀၉
Chronicle of a Death Foretold , ၂၀၀၃

         



US edition ပထမအကြိမ် မျက်နှာဖုံး, ၁၉၈၃
စပိန်စကားပြော ရုပ်ရှင် , ၁၉၈၇

          ဝတ္ထုကို မူရင်းနာမည်ဖြင့်ပင် စပိန်စကားပြော ရုပ်ရှင်အဖြစ် ရိုက်ကူးခဲ့ပြီး ၁၉၈၇ ၊ Cannes ရုပ်ရှင်
ပွဲတော်တွင် ပြသခဲ့သည်။ ၁၉၉၅ ၊ Broadway တွင် ပြဇာတ်အဖြစ် မူရင်းနာမည်ဖြင့် တင်ဆက်ခဲ့သည်။ ကျွန်တော်ကတော့ ရုပ်ရှင်ရော ၊ ပြဇာတ်ရောကို အခွင့်ရလျှင် ကြည့်ချင်ပါသည်။


* * * * * * * *

၃။ သန်းခေါင်ယံ လွတ်လပ်ရေး ၊ မောင်ပေါ်ထွန်း


( ဆက်ရန် ) 

-----------------------------------------------------------

No comments:

Post a Comment